NÝTT! Jólakonfekt í Borgarnesi og Akranesi 

Komdu þér í jólaskap og lærðu að búa til þitt eigið gómsæta jólakonfekt undir handleiðslu Halldórs Kr. Sigurðssonar, bakara og konditors.

Á þessu notalega og skapandi námskeiði fá þátttakendur tækifæri til að kynnast listinni að búa til fallegt og bragðgott konfekt frá grunni. Farið verður yfir helstu aðferðir við konfektgerð, allt frá vali á hráefnum og meðhöndlun súkkulaðis til mótunar, fyllingar og skreytingar.

Þátttakendur læra meðal annars að tempra bæði dökkt og ljóst súkkulaði, en rétt temprun er lykillinn að fallegu konfekti með glansandi áferð og góðri áferð við bit.

• Í lok námskeiðsins fer hver þátttakandi heim með sitt eigið handgerða jólakonfekt – til að njóta, gefa eða bjóða upp á yfir hátíðarnar.
• Öll hráefni og nauðsynlegur búnaður eru innifalin í námskeiðsgjaldinu. Þátttakendur taka með sér heim konfektið sem þeir útbúa á námskeiðinu.
• Við mælum með að þátttakendur taki með sér ílát til að geyma og flytja konfektið heim.
• Námskeiðið hentar jafnt byrjendum sem þeim sem hafa einhverja reynslu af konfektgerð og vilja bæta við þekkingu sína, læra nýjar aðferðir og fá innblástur fyrir jólaundirbúninginn.

Tímasetning og staðsetning

Boðið verður upp á tvö eins námskeið í nóvember, svo þátttakendur geti valið það námskeið sem þeim hentar best.

• Námskeið 19. nóvember: Borgarnes kl. 18-20.
• Námskeið 25. nóvember: Akranes kl. 18-20.
• Nánari staðsetning auglýst síðar.
• Athugið að námskeiðið hefst  þegar næg þátttaka næst.

Leiðbeinandi

Halldór Kr. Sigurðsson, bakari og konditor.

Halldór hefur áralanga reynslu af bakstri og konditorvinnu og hefur um árabil miðlað þekkingu sinni til áhugafólks um sætabrauðsgerð. Hann hefur meðal annars kennt konfektgerð, kransakökugerð og páskaeggjagerð og leggur áherslu á hagnýta kennslu þar sem þátttakendur fá að spreyta sig sjálfir.

Nánari upplýsingar
hekla@simenntun.is